ឯកឧត្តម​តំណាងរាស្ត្រ​មណ្ឌល​រតនគិរី សុំ​ឲ្យ​ប្រជា​ពលរដ្ឋ​ចេះ ស្រលាញ់​សម្បត្តិ​ធម្មជាតិ និង​ខិតខំ​បង្កបង្កើន​ផល​

​ប្រសាសន៍​នេះ ឯកឧត្តម​បាន​លើកឡើង គ្រា​ដែល​ឯកឧត្តម និង​លោកជំទាវ ចុះសួរសុខទុក្ខ សំណេះសំណាល​ជាមួយ ប្រជាពលរដ្ឋ​ចំនួន ១០២​គ្រួសារ រស់​នៅ​ជាប់​ព្រំដែន​កម្ពុជា​វៀតណាម នៅ​ភូមិ​តា​ង៉ា ឃុំ​ញ៉ាង ស្រុក​អណ្ដូង​មាស ខេត្តរ​ត​គិរី នា​ថ្ងៃ​ទី​២០ ខែវិច្ឆិកា ឆ្នាំ​២០២០ ដោយ​មាន​ការចូលរួម​ពី​លោក ងួន គឿន ក្រុមប្រឹក្សា​ខេត្ត មន្ទីរ​អង្គភាព​ជុំវិញ​ខេត្ត អាជ្ញាធរ​ស្រុក​អណ្ដូង​មាស ព្រមទាំង​កងកម្លាំងប្រដាប់អាវុធ​វីរៈ​ការពារ​ព្រំដែន​ទាំង​ពីរ​ប្រភេទ​ផងដែរ​។​
 

​គ្រា​ចុះសួរសុខទុក្ខ​សំណេះសំណាល​នោះ​ផងដែរ ឯកឧត្តម​តំណាងរាស្ត្រ ក៏​បាន​នាំយក​អំណោយ​មួយចំនួន ចែកជូន​ប្រជាពលរដ្ឋ​ទាំង ១០២​គ្រួសារ លោកគ្រូ​អ្នកគ្រូ ព្រម​ទាំង​សម្ភារៈ​សិក្សា ចែក​ជូន​សិស្សានុសិស្ស​ចំនួន ៨២​នាក់​។ ក្នុងនោះ មួយ​គ្រួសារ បាន​សារុង​១ ក្រ​ម៉ា​១ និង​លុយ ៤​ពាន់​រៀល​, លោកគ្រូ​អ្នកគ្រូ ៣​នាក់ ក្នុង​ម្នាក់ៗ បាន ៨​ម៉ឺន​រៀល ចំណែក​សិស្សានុសិស្ស ម្នាក់ៗ បាន​សៀវភៅ ២​ក្បាល ប៊ិច​២ និង​ប្រាក់ ២​ពាន់​រៀល នំ​ប៉ោង​ចំនួន​៥០០​នំ ក្រុម​របាំ​ជនជាតិដើម​ភាគតិច បាន​ចំនួន ៥០​ម៉ឺន​រៀល ព្រមទាំង​ឧបត្ថម្ភ ចាន ១០០ ស្លាបព្រា​១០០ និង​ខ្ទះត្នោត​ធំ​១ សម្រាប់​បម្រើការ​ក្នុង​ភូមិ គ្រា​មាន​កម្មវិធី ឬ​បុណ្យ​ទាន​ម្ដងម្កាល​ផងដែរ​។​
 

​នៅពេល​សំណេះសំណាល​ជាមួយ​ប្រជាពលរដ្ឋ​នោះ ឯកឧត្តម​តំណាងរាស្ត្រ បាន​លើកឡើង​ថា ដោយ​អនុវត្ត​កម្មវិធី​នយោបាយ​យុទ្ធសាស្ត្រ​ចតុកោណ​ដំណាក់កាល​ទី​៤ របស់​រាជរដ្ឋាភិបាល នីតិកាល​ទី​៦ នៃ​រដ្ឋសភា ជាពិសេស ការអនុវត្ត​កំណែទម្រង់​វិមជ្ឈការ និង​វិសហមជ្ឈការ ដែលមាន​សម្ដេច​អគ្គមហាសេនាបតី​តេជោ ហ៊ុន សែន ជា​នាយករដ្ឋមន្ត្រី នៃ​ព្រះរាជាណាចក្រ​កម្ពុជា បាននិងកំពុង​ដឹកនាំ​ប្រកបដោយ​គតិបណ្ឌិត ភាពឈ្លាសវៃ ស្ថិតក្នុង​ស្ថានភាព​ប្រទេស​ជាតិ មាន​សុខសន្តិភាព ស្ថេរភាព​នយោបាយ ដែល​បាន​ផ្ដល់​នូវ​ភាពសុខដុមរមនា និង​សុខមាលភាព​ក្នុងសង្គម ព្រមទាំង​កំពុងមាន​ការអភិវឌ្ឍ​ន៍ រីកចម្រើន​ឈាន​ឡើង​ជា​លំដាប់​លើ​គ្រប់​វិស័យ​។ ដូច្នេះ ឯកឧត្តម​តំណាងរាស្ដ្រ សុំ​ឱ្យ​ប្រជាពលរដ្ឋ មេត្តា ចេះ​ការពារ​បរិស្ថាន ការពារ​ដី ព្រៃឈើ ដែល​ជា​របស់​យើង និង​ខិតខំ​បង្កបង្កើន​ផល ធ្វើស្រែ​ចំការ ដើម្បី​ផ្គត់ផ្គង់​ជីវភាព​គ្រួសារ​ឲ្យ​កាន់តែ​ថ្កុំថ្កើង​ប្រសើរ​ឡើង​ជាង​មុន​៕